Sunday, August 11, 2013

റിവ്യൂ ചുരുക്കത്തില്‍

കഴിഞ്ഞുപോയ ചില ചിത്രങ്ങളുടെ റിവ്യൂ എഴുതുവാന്‍ ചില സാങ്കേതികവും പ്രായോഗികവുമായ കാരണങ്ങളാല്‍ വൈകിയതിനാല്‍, ചുരുക്കത്തില്‍ താഴെ ചേര്‍ക്കുന്നു.

101 ചോദ്യങ്ങള്‍ 
രചന, സംവിധാനം: സിദ്ധാര്‍ത്ഥ ശിവ

ഒരു കുട്ടിയിലൂടെ സമൂഹത്തിലെ ചില അവസ്ഥകളെ നോക്കിക്കാണാനുള്ള ഭേദപ്പെട്ട ഒരു ശ്രമം തന്നെയാണ്‌ ഈ ചിത്രം. മിനോണ്‍ എന്ന ബാലതാരം പ്രേക്ഷക ഹൃദയത്തില്‍ സ്ഥാനം പിടിക്കുന്നു. പല സന്ദര്‍ഭങ്ങളിലും ഹൃദയത്തിണ്റ്റെ വിങ്ങലുകള്‍ കണ്ണുനീരണിയിക്കുന്നു.
പക്ഷേ, കണ്ട്‌ മടുത്ത ഒരു ശോകാവസ്ഥ തന്നെ ആശ്രയിക്കേണ്ടിവന്നു എന്നത്‌ ഒരു ന്യൂനതയായി. സംവിധായകണ്റ്റെ ആദ്യ സംരംഭമെന്ന നിലയില്‍ ഈ ചിത്രം അഭിനന്ദനമര്‍ഹിക്കുന്നു.

Rating : 6.5 / 10

5 സുന്ദരികള്‍

സംവിധാനം: ഷൈജു ഖാലിദ്‌ / സമീര്‍ താഹിര്‍ / ആഷിക്ക്‌ അബു / അമല്‍ നീരദ്‌ / അന്‍ വര്‍ റഷീദ്‌ കഥ, തിരക്കഥ, സംഭാഷണം: M. Mukundan, Shyam Pushkar, Muneer Ali / Siddharth Bharathan / Abhilash Kumar, Amal Neerad / Unni R. / Hashir Muhammad

സേതുലക്ഷ്മി: കുട്ടികള്‍ കേന്ദ്ര കഥാപാത്രങ്ങളായ ഈ കഥയാണ്‌ ഈ കൂട്ടത്തില്‍ ഏറ്റവും മികച്ചത്‌. പ്രേക്ഷകമനസ്സിലെ വല്ലാതെ സ്വാധീനിക്കുന്ന തരത്തില്‍ ഈ കുട്ടികളുടെ അഭിനയവും മികച്ച്‌ നിന്നു.

ഇഷ: കൌതുകം ജനിപ്പിക്കാനുള്ള ശ്രമം നടത്തി നോക്കിയെങ്കിലും ഈ കഥ അത്രയ്ക്ക്‌ ഏശിയില്ല. പാറാവിന്‌ നില്‍ക്കുന്ന പോലീസുകാരന്‍ വളരെ പരിചയമുള്ള പോലെ സംസാരിക്കുന്നത്‌ കാണുമ്പോള്‍ ഇത്‌ വരെ കണ്ടിട്ടില്ലാത്ത ഒരു പെണ്‍ കുട്ടിയോടാണ്‌ ആ സംസാരം എന്ന്‌ വിശ്വസിക്കാന്‍ പ്രയാസം.

ഗൌരി: സസ്പെന്‍സ്‌ ഒരുക്കി ഭര്‍ത്താവ്‌ മരിച്ചുപോകുന്നു. ഇതെന്താണാവോ ഇങ്ങനെ എന്ന്‌ തോന്നുകയും കാര്യമായി ഒരു എത്തും പിടിയും കിട്ടാതിരിക്കുകയും ചെയ്യുമെങ്കിലും നഷ്ടപ്പെടലിണ്റ്റെ വേദന തീവ്രമായിരുന്നു.

കുള്ളണ്റ്റെ ഭാര്യ: ഒരു കോളനിയെ സമൂഹമായി കണ്ട്‌ അതില്‍ സംഭവിക്കുന്ന അനാവശ്യ ഇടപെടലുകളെ വളരെ ഭംഗിയായി ചിത്രീകരിച്ചിരിക്കുന്നു. ക്ളൈമാക്സില്‍ കുള്ളണ്റ്റെ കുടയിലെ ആ വലിയ ശൂന്യത പ്രേക്ഷക മനസ്സിനെ പിടിച്ചുലയ്ക്കുന്നു.

ആമി: കൌതുകകരമായ ഒരു അനുഭവവും ആസ്വാദനവും നല്‍കുന്നു ഈ കഥ.

Rating : 6.5 / 10

ലെഫ്റ്റ്‌ റൈറ്റ്‌ ലെഫ്റ്റ്‌ 

സംവിധാനം: അരുണ്‍ കുമാര്‍ അരവിന്ദ്‌
രചന: മുരളി ഗോപി

കമ്മ്യൂണിസ്റ്റ്‌ രാഷ്ട്രീയ പശ്ചാത്തലത്തില്‍ നടക്കുന്ന ഒരു കഥയാണ്‌ ഈ ചിത്രത്തില്‍ വിവരിക്കുന്നത്‌. പഴയ കാലഘട്ടവും ഇന്നത്തെ അവസ്ഥയും മികച്ച രീതിയില്‍ വരച്ചുകാട്ടുവാന്‍  ഇതിണ്റ്റെ പിന്നണിപ്രവര്‍ത്തകര്‍ക്ക്‌ സാധിച്ചിരിക്കുന്നു.

ഇന്ദ്രജിത്‌, മുരളി ഗോപി തുടങ്ങിയവരെല്ലാം നല്ല അഭിനയമികവ്‌ പുറത്തെടുത്തിരിക്കുന്നു. ഇന്ദ്രജിത്തിണ്റ്റെ അമ്മയായി അഭിനയിച്ച നടിയും അഭിനന്ദനമര്‍ഹിക്കുന്നു.
മുരളിഗോപി അവതരിപ്പിക്കുന്ന കഥാപാത്രത്തിണ്റ്റെ ചെറുപ്പകാലത്തെക്കുറിച്ച്‌ നല്‍കുന്ന ഫ്ളാഷ്‌ ബാക്ക്‌ സൂചനകള്‍ കാണുമ്പോള്‍ എന്തൊക്കെയോ ഭീകര സംഭവങ്ങള്‍ എന്ന പ്രതീക്ഷ തോന്നുമെങ്കിലും അത്‌ ഒരു വളരെ ചെറിയ എപ്പിസോഡായി അവശേഷിക്കുന്നു.
രാഷ്ട്രീയ നേതാക്കളെ രൂപത്തിലും ഭാവത്തിലും ഭാഷയിലും അനുകരിച്ച്‌ ഒരു ഏകപക്ഷീയ രാഷ്ട്രീയ സ്വഭാവം പ്രകടിപ്പിക്കുന്നു എന്നതിനാല്‍ വേണ്ടത്ര പ്രേക്ഷക പ്രശംസ ലഭിക്കാതെ പോയി എന്ന്‌ തോന്നുന്നു.

മുരളി ഗോപിയുടെ രചന പ്രത്യേകം അഭിനന്ദനമര്‍ഹിക്കുന്നു.

Rating : 6 / 10

എ ബി സി ഡി

സംവിധാനം: മാര്‍ട്ടിന്‍ പ്രക്കാട്ട്‌
കഥ/തിരക്കഥ, സംഭാഷണം: സൂരജ്‌-നീരജ്‌/മാര്‍ട്ടിന്‍ പ്രക്കാട്ട്‌, നവീന്‍ ഭാസ്കര്‍, സൂരജ്‌-നീരജ്‌

ഭേദപ്പെട്ട ഒരു ഹാസ്യ ചിത്രം എന്ന നിലയില്‍ ഈ സിനിമ ജനപ്രീതി നേടി. തുടര്‍ച്ചയായ ഒരു താല്‍പര്യം ജനിപ്പിക്കാനായില്ലെങ്കിലും പ്രേക്ഷകര്‍ക്ക്‌ തരക്കേടില്ലാതെ ആസ്വദിക്കാവുന്ന ഒരു ചിത്രം.

നായികയുടെ അവസ്ഥയെക്കുറിച്ച്‌ പ്രേക്ഷകര്‍ക്ക്‌ ഒരു എത്തും പിടിയും കിട്ടില്ലെങ്കിലും അമേരിക്കയില്‍ നിന്ന്‌ നാട്ടില്‍ വന്ന്‌ കഷ്ടപ്പെടുന്ന നായകണ്റ്റെ അവസ്ത്ത ഒരല്‍പ്പം അതിശയോക്തിപരമെന്നും തോന്നാം.
ദുല്‍ഖര്‍ സല്‍ മാനും ജേക്കബ്‌ ഗ്രിഗറിയും മികച്ച അഭിനയം കാഴ്ച വെച്ചിരിക്കുന്നു.

Rating : 6 / 10

താങ്ക്‌ യു

സംവിധാനം : വി. കെ. പ്രകാശ്‌
രചന: അരുണ്‍ ലാല്‍

ആദ്യ പകുതി വളരെ പതുക്കെ പോകുന്നത്‌ ബൊറടി സൃഷ്ടിക്കുമെങ്കിലും ഈ സിനിമയുടെ അവസാനഭാഗത്തോടടുക്കുമ്പോഴും സിനിമയുടെ ക്ളൈമാക്സ്‌ കഴിയുമ്പോഴും ആ ആദ്യപകുതിയുടെ പ്രാധാന്യം നമ്മുടെ ശ്രദ്ധയില്‍ വരികയും ചെയ്യുന്നു എന്നത്‌ ഒരു പ്രത്യേകതയാണ്‌. പക്ഷേ, അനുഭവിച്ച്‌ കഴിഞ്ഞ ബൊറടിയെ അത്‌ ബോറടിയല്ലായിരുന്നു എന്ന്‌ മനസ്സിലാക്കിയിട്ട്‌ കാര്യമില്ലല്ലോ.
പല സിനിമകളിലും വാര്‍ത്തകളിലുമായി കണ്ട്‌ മടുത്ത ശിശുപീഠനത്തിണ്റ്റെ വേദന, ചിത്രത്തില്‍ വന്നപ്പോള്‍ വേണ്ടത്ര ഏശിയില്ലെങ്കിലും ക്ളൈമാക്സ്‌ മികച്ചതായി.
ദേശീയഗാനത്തിണ്റ്റെ ക്രെഡിറ്റില്‍ പ്രേക്ഷകരെ എഴുന്നേല്‍പിച്ച്‌ നിര്‍ത്തിക്കളയാം എന്ന ഗൂഡ്ഡ്‌ തന്ത്രം ഗുണം ചെയ്തില്ല

Rating: 5 / 10

No comments: